Şəhid Asim Abbasov, Elşən Cəfərli və Ramin Kərimlinin 4-cü ildönümü mərasimləri qeyd olunub
28 sentyabr 2024 | 14:16
Sentyabrın 28-də Vətən müharibəsində şəhidlik zirvəsinə yüksələn, İmişli rayonunun Hacırüstəmli kəndindən olan Abbasov Asim Rasim oğlunun, Qulubəyli kəndindən olan Cəfərli Elşən Rəfail oğlunun və Qaragüvəndikli kəndindən olan Kərimli Ramin Əli oğlunun 4-cü ildönümü mərasimləri qeyd olunub. Mərasimdə İmişli Rayon İcra Hakimiyyətinin məsul işçiləri ilə yanaşı şəhid ailələri, şəhidlərin doğmaları və rayonun ictimaiyyət nümayəndələri iştirak ediblər. Mərasim zamanı şəhidlərimizin əziz xatirəsi dərin ehtiramla yad olunub, ruhlarına dualar oxunub. Şəhid ailələri ilə səmimi söhbət zamanı bildirilib ki, cəmi 44 gün davam edən Vətən müharibəsində qəhrəman oğullarımız göstərdikləri şücaətlə bir daha sübut etdilər ki, xalq şəhid verirsə, deməli, o xalq böyük xalqdır. Ali Baş Komandan cənab İlham Əliyevin rəhbərliyi, Milli Ordunun rəşadəti, xalq və dövlətin birliyi ilə İkinci Qarabağ müharibəsində və antiterror tədbirlərində qazanılan Zəfər Azərbaycan tarixinin ən parlaq səhifələrindən biri kimi yaddaşlara əbədi həkk olunduğu diqqətə çatdırılıb. Şəhidlərimizin ailə üzvləri isə hər zaman dövlət qayğısı ilə əhatə olunduqlarına görə razılıqlarını ifadə ediblər.
Allah bütün şəhidlərimizə rəhmət eləsin!
Keçidlər
