İmişlidə qanunsuz fəaliyyət göstərən qum-çınqıl karxanalarının fəaliyyətinin dayandırılması istiqamətində işlər davam edir
14 iyul 2025 | 12:36
İmişli rayonu ərazisində torpaq və təbii ehtiyatlardan qanunsuz istifadə hallarının, xüsusilə Araz çayı məcrasında və sanitar mühafizə zonasında yerləşən ərazilərdə aparılan qanunsuz qum-çınqıl hasilatının qarşısının alınması istiqamətində qanunvericiliyin tələblərinə uyğun olaraq ardıcıl tədbirlər görülür. Belə ki, İmişli Rayon İcra Hakimiyyəti başçısının müvafiq sərəncamı ilə bu sahədə nəzarətin gücləndirilməsi məqsədilə tərkibində Azərbaycan Respublikası Ekologiya və Təbii Sərvətlər Nazirliyi, Azərbaycan Respublikasının İqtisadiyyat Nazirliyi yanında Əmlak Məsələləri Dövlət Xidməti, Fövqəladə Hallar Nazirliyinin Sənayedə İşlərin Təhlükəsiz Görülməsi və Dağ-mədən Nəzarəti Dövlət Agentliyi, Azərbaycan Dövlət Su Ehtiyatları Agentliyi, İmişli Rayon Polis Şöbəsi, bələdiyyə sədrləri və aidiyyəti üzrə nümayəndəliklərin təmsilçilərinin daxil olduğu Komissiya yaradılmışdır.
Komissiya tərəfindən 2025-ci ilin 26–29 may tarixlərində aparılmış monitorinqlər zamanı İmişli rayonu ərazisində torpaq qanunvericiliyinin və yerin təkindən istifadə qaydalarının pozulması faktları aşkar edilmiş, o cümlədən qum-çınqıl hasilatının müvafiq icazə sənədləri olmadan həyata keçirildiyi müəyyən olunmuşdur. Nəticədə, Komissiyanın keçirdiyi monitorinqlər zamanı qanunsuz fəaliyyət göstərən qum-çınqıl karxanalarının hər biri ilə bağlı qanunauyğun hüquqi tədbirlər görülməsi məqsədilə aktlar tərtib edilərək aidiyyəti üzrə İmişli Rayon İcra Hakimiyyəti tərəfindən müvafiq orqanlara məktublar göndərilmişdir. Qeyd edək ki, aparılmış monitorinqlər zamanı qeydə alınmış foto materiallar qanunsuz fəaliyyətin miqyasını və ətraf mühitə vurulan ziyanın ciddiliyini əyani şəkildə əks etdirir. Hazırda monitorinqlər nəticəsində qanunsuz fəaliyyəti aşkar edilmiş qum-çınqıl karxanalarının texnika və avadanlıqları, İmişli Rayon İcra Hakimiyyəti və aidiyyəti qurumların əməkdaşlarının iştirakı ilə ərazidən çıxarılaraq fəaliyyətləri dayandırılır. Görülən tədbirlərlə bağlı fotolar təqdim edilir.
Keçidlər
