İmişlidə antiterror əməliyyatları şəhidi Seymur Əzizalıyevin ildönümü qeyd olunub
20 sentyabr 2024 | 12:47
2023-cü il sentyabrın 19-da Qarabağda keçirilən lokal antiterror tədbirləri zamanı şəhid olan Əzizalıyev Seymur Teyyub oğlunun ildönümü mərasimi bu gün ailə üzvlərinin yaşadığı İmişli şəhərində qeyd olunub. Mərasimdə İmişli Rayon İcra Hakimiyyətinin başçısı Elçin Rzayev və rayonun hüquq-mühafizə orqanlarının rəhbərləri iştirak ediblər. Mərasim iştirakçıları əvvəlcə şəhidimizə Allahdan rəhmət, ailəsinə isə səbir diləyiblər. Sonra şəhidimizin keçdiyi şərəfli döyüş yolu xatırlanıb, onun lokal antiterror tədbirləri zamanı rəşadətindən bəhs edilib, əziz xatirəsi ehtiramla yad olunub, ruhuna dualar oxunub. Seymur kimi digər şəhidlərimizin də xatirələrinin qəlblərdə əbədi yaşayacağı, illər keçsə belə Vətənimizin ərazi bütövlüyünü canı, qanı bahasına qoruyan, düşmən tapdağından azad edən igid oğullarımızla hər zaman qürur duyulacağı bildirilib. Şəhidimizin ailə üzvləri hər zaman dövlət qayğısı ilə əhatə olunduqlarına görə minnətdarlıqlarını bildiriblər.
Allah rəhmət eləsin!
Keçidlər
