İmişli rayonunun Xəlfəli kəndində şəhid ailələri yaşayan kənddaxili yollar asfaltlanıb
23 dekabr 2024 | 17:56
İmişli rayonunda Azərbaycanın ərazi bütövlüyü uğrunda qəhrəmancasına şəhid olan sakinlərin adlarının əbədiləşdirilməsi, onların əziz xatirəsini daim yaşatmaq, ailələrinə diqqət və qayğı göstərmək, problemlərinin həlli istiqamətində təxirəsalınmaz tədbirlərin həyata keçirilməsi xüsusi diqqətdə saxlanılır. Belə ki, görülən tədbirlər çərçivəsində torpaqlarımızın düşmən tapdağından azad olunmasında şücaət göstərərək Vətən müharibəsində şəhidlik zirvəsinə ucalan Vəliyev Tural İlham oğlunun, Gülalıyev Əlnur Seymur oğlunun və antiterror əməliyyatlarında şəhid olan Babaşov Ucal Nərbala oğlunun ailə üzvlərinin yaşadıqları rayonun Xəlfəli kəndində kənddaxili yollar abadlaşdırılaraq yeni asfalt örtüyü salınıb. Sözügedən yollarda tikinti norma və standartlarına uyğun olaraq aparılan əsaslı təmir işləri tez bir zamanda yekunlaşdırılıb və bu yolla hərəkət zamanı yaranmış çətinliklər aradan qaldırılıb. Hazırda şəhid ailələrinin yaşadıqları digər ərazilərdə təmirsiz yolların asfaltlanması istiqamətində görülən işlər davam etdirilir.
Qeyd edək ki, həyata keçirilən bu layihələr şəhid ailələrinin həyat şəraitinin yaxşılaşdırılması ilə yanaşı həm də kənddə ümumi yaşayış səviyyəsinin yüksəldilməsini təmin edir. Xəlfəli sakinləri həyata keçirilən tədbirlərdən məmnunluq hissi keçirdiklərini bildirirərək şəhidlərin xatirəsinin uca tutulmasından qürur duyduqlarını ifadə ediblər.
Keçidlər
