General Kənan Seyidov oxuduğu Bəhrəmtəpə qəsəbə tam orta məktəbində görüş keçirib
11 noyabr 2022 | 19:16
44 günlük Vətən Müharibəsində öz igidliyi və şücaəti ilə dastan yazan oğllarımızdan biri də Vətən müharibəsinin Komandanlarından biri, Vətən Müharibəsi Qəhrəmanı, general-mayor Kənan Seyidovdur. General Kənan Seyidov İkinci Qarabağ müharibəsi zamanı düşmənə qan udduran xüsusi təyinatlı qüvvələrin komandanlarından biri kimi şanlı döyüş yolu keçib. Bu gün General Kənan Seyidov oxuduğu İmişli rayonunun R.Alışov adına Bəhrəmtəpə qəsəbə tam orta məktəbində şagirdlər və qəsəbə ictimaiyyəti ilə görüş keçirib. Görüşdə Kənan Seyidovla yanaşı, general-mayor Rasim Babayev, İmişli Rayon İcra Hakimiyyətinin başçısı Elçin Rzayev, YAP İmişli rayon təşkilatının sədri Səfa Ağayev, rayonun hüquq-mühafizə orqanlarının rəhbərləri iştirak ediblər. Görüş zamanı Silahlı Qüvvələrin Ali Baş Komandanı cənab İlham Əliyevin böyük cəsarəti və əzmkarlığı sayəsində Vətən müharibəsində Azərbaycan Ordusunun qazandığı möhtəşəm Qələbədən söhbət açılıb. Allahdan şəhidlərimizə rəhmət, qazilərimizə cansağlığı dilənilib, Müzəffər Ali Baş Komandan cənab İlham Əliyevə və Silahlı Qüvvələrimizin qəhrəman əsgər və zabitlərinə minnətdarlıq ifadə edilib. Sonra Vətənə və şəhidlərimizə həsr olunmuş şeirlər səsləndirilib.
Yüksək vətənpərvərlik duyğuları ilə keçən görüş iştirakçılar tərəfindən böyük məmnunluq və razılıqla qarşılanıb. Sonda şəhid ailələrinə hədiyyələr təqdim olunub, xatirə şəkilləri çəkdirilib.
Keçidlər
